23 тамыз: Сайлаудан кейін – жәрмеңкеге
Құрылтай сайлауы өтіп жатқан күні Қызылорда қаласында дауыс беру науқанымен қатар ауыл шаруашылығы жәрмеңкелері де ұйымдастырылды. Бұл күні қала тұрғындары азаматтық таңдауын жасап қана қоймай, күнделікті қажетті азық-түліктерін тиімді бағамен сатып алуға мүмкіндік алды.
Жәрмеңке сөрелерінде әлеуметтік маңызы бар азық-түлік өнімдерімен қатар, маусымдық жеміс-жидек пен көкөністер де қолжетімді бағамен ұсынылды. Дауыс беруге келген тұрғындардың бір бөлігі сайлау учаскесіне соғып, өз таңдауын жасағаннан кейін жәрмеңкеге барып, қажетті өнімдерін сатып алды.
Жәрмеңкеде сауда-саттық қызу жүріп, тұрғындардың қарасы қалың болды. Осылайша, сайлау күні қалада азаматтық белсенділік пен күнделікті әлеуметтік тіршілік қатар өрбіді.
– Бүгін сайлауға дауыс беруге шыққан едім. Дауыс беріп болған соң жәрмеңкеге соғып, біраз азық-түлік алып алдым. Балаларға қауын-қарбызды арзан бағаға сатып алдым. Еліміз аман, жұртымыз тыныш болсын, – дейді қала тұрғыны.
Сайлау күні ұйымдастырылған ауыл шаруашылығы жәрмеңкелері тұрғындарға сапалы әрі қажетті өнімдерді қолжетімді бағамен сатып алуға мүмкіндік беріп, қаладағы әлеуметтік белсенді күннің мазмұнын толықтыра түсті.
