Жосалы вокзалы: ғасырлық тарихы бар нысан жаңа келбетке ие болды

Қармақшы ауданындағы Жосалы теміржол вокзалы қайта жаңғыртылып, жолаушыларға жаңарған келбетте қызмет көрсете бастады. Ғасырдан астам уақыт бойы Сыр бойындағы маңызды көлік нүктелерінің бірі болған тарихи нысан енді заманауи талаптарға сай жабдықталды.

Жаңарған вокзалдың ашылу рәсімі облыс әкімі Мұрат Ергешбаевтың Қармақшы ауданына жұмыс сапары барысында өтті. Салтанатты шараға Құрылтай депутаттары, мәслихат депутаттары, зиялы қауым өкілдері, ардагерлер мен аудан тұрғындары қатысты.

Жосалының тарихы теміржолмен тығыз байланысты. Кенттің қалыптасуына серпін берген негізгі факторлардың бірі де осы теміржол болды. 1905 жылы «Орынбор – Ташкент» магистралі бойында Жосалы станциясы пайдалануға беріліп, елді мекен біртіндеп өңірдегі маңызды қатынас және сауда нүктелерінің біріне айналды.

Сол кезеңнен бері теміржол Жосалының тыныс-тіршілігімен біте қайнасып келеді. Жолаушылар пойызы тоқтайтын, жүк тасымалы жүзеге асатын станция маңында теміржолшыларға арналған тұрғын үйлер, шеберханалар мен қызметтік ғимараттар бой көтерді. Осылайша Жосалы теміржолшылардың еңбегімен де танылған елді мекенге айналды.

Ғасырдан астам уақыт ішінде талай тарихи кезеңді бастан өткерген вокзал ғимараты бүгінде жаңа сипатқа ие болды. Соңғы рет 2012 жылы жөндеуден өткен нысанға бұл жолы ауқымды жаңғырту жұмыстары жүргізілді. Оған 986 млн теңге қаржы бағытталды.

Жаңартылған вокзалдың жалпы аумағы 674,6 шаршы метр. Мұнда тәулігіне шамамен 200 жолаушыға қызмет көрсетуге мүмкіндік бар.

Жөндеу барысында ғимараттың қасбеті мен іргетасы жаңартылып, төбе жабындысы толық ауыстырылды. Есік-терезелер жаңаланып, электр желілері қайта монтаждалды. Жылу жүйесі жүргізіліп, перрон аумағы абаттандырылды.

Жолаушылардың жайлылығына да ерекше мән берілген. Вокзал ішінде кең күту залы, ана мен балаға арналған бөлме, медициналық пункт, жүк сақтау қоймасы қарастырылған. Мүмкіндігі шектеулі азаматтардың ғимаратқа кіріп-шығуына және қызмет алуына қажетті жағдай жасалды.

Ашылу рәсімінде облыс әкімі Мұрат Ергешбаев Жосалы вокзалының тарихи маңызына тоқталды.

«Орынбор – Ташкент» теміржол магистралінің салынуы Жосалының экономикалық және әкімшілік тұрғыдан қалыптасуына үлкен әсер етті. Ғасырдан астам уақыт бойы елге қызмет етіп келе жатқан тарихи ғимараттың жаңаруы – өткен мен бүгінді жалғаған маңызды қадам», – деді аймақ басшысы.

Салтанатты шарада теміржол саласында ұзақ жыл еңбек еткен қызметкерлер мен вокзалды жаңғырту жұмыстарына атсалысқан мердігер мекеме өкілдеріне облыс әкімінің Алғыс хаттары табысталды. Құрылтай депутаты Нұркен Бақытбекұлы құттықтау сөз сөйлеп, Қармақшы ауданының құрметті азаматы Асқар Мереков ақ батасын берді.

Жосалы вокзалының жаңаруы – жай ғана ғимараттың жөнделуі емес. Бұл – тарихы теміржолмен тамырлас елді мекеннің тынысын жаңғыртып, жолаушыларға көрсетілетін қызмет сапасын арттыруға бағытталған жұмыс.

Бүгінде Сыр бойындағы теміржол инфрақұрылымы кезең-кезеңімен жаңарып келеді. Тарихи нысандардың бастапқы келбетін сақтай отырып, оларды қазіргі заман талабына бейімдеу – өткенге құрмет пен болашаққа жасалған инвестицияның бір көрінісі.

Жаңарған Жосалы вокзалы енді жолаушыларды жайлы жағдаймен қарсы алып, Қармақшының тарихы мен бүгінін жалғап тұрған маңызды нысандардың бірі ретінде қызмет ете бермек.