«Ел іші – өнер кеніші»

Жосалы кентінің орталық алаңында аудан әкімінің тапсырмасына сәйкес дәстүрлі түрде ұйымдастырылатын «Ел іші – өнер кеніші» мәдени жобасының кезекті концерті өтті. Ұлттық өнерді ұлықтап, ауыл-аймақтағы талантты өнерпаздардың шығармашылығын көпшілікке таныстыруды мақсат еткен мәдени шараға тұрғындар көп жиналды.

«Ел іші – өнер кеніші» – ауданның мәдени өміріндегі өзіндік орны қалыптасқан жобалардың бірі. Оның басты мақсаты – ел ішінде жүрген өнерлі азаматтарды қолдау, олардың шығармашылығын кеңінен насихаттау, ұлттық өнердің дәстүрлі үлгілерін кейінгі буынға дәріптеу. Сонымен қатар жоба ауыл тұрғындарының бос уақытын тиімді ұйымдастырып, мәдени-рухани ортаны жандандыруға бағытталған.

Бұл жолғы концерттік бағдарламаның шымылдығын Ақтөбе және Жосалы ауылдық округтерінің өнерпаздары ашты. Сахна төріне шыққан өнерпаздар көрерменге ән мен жырдан, күй мен биден шашу шашып, өнердің түрлі жанрын қамтыған мазмұнды бағдарлама ұсынды.

Әуелеген ән, күмбірлеген күй мен ұлттық нақыштағы би көрерменнің көңілінен шықты. Әсіресе дәстүрлі өнерге негізделген шығармалардың орындалуы көпшіліктің ықыласына бөленді. Өнерпаздарға қолдау білдірген тұрғындар концерт барысында ыстық ықыластарын танытып, әрбір өнер көрсетілімін қошеметпен қабылдады.

Мәдени кештің тағы бір ерекшелігі – аудан көлеміндегі өнерпаздардың басын қосып, ауыл мәдениетінің тынысын кеңінен танытуында. Әр ауылдық округте өзіндік өнер мектебі, сахнаға бейімі бар талантты жастар мен аға буын өкілдері бар. Осындай жобалар сол өнер иелеріне өз қабілетін көпшілік алдында көрсетуге мүмкіндік береді.

Жоба аясында сахнаға шығатын өнерпаздар қатарында кәсіби мәдениет қызметкерлерімен бірге ауылдық жерлердегі өнерпаздар, шығармашылық ұжымдар мен талантты жастар да бар. Бұл өз кезегінде ауылдағы мәдени ортаның дамуына, дәстүрлі өнердің сабақтастығына оң ықпал етеді.

Жосалы кентінің орталық алаңындағы ашық аспан астындағы концерт тұрғындар үшін жай ғана мәдени шара емес, көпшілік бас қосып, рухани тынығатын ортаға айналды. Мұндай кештер ауыл тұрғындарының мәдени өмірге деген қызығушылығын арттырып, ел арасындағы өнерпаздарды жаңа шығармашылық ізденістерге ынталандыра түседі.

Айта кетейік, «Ел іші – өнер кеніші» мәдени жобасы қыркүйек айына дейін әр сенбі сайын Жосалы кентінің орталық алаңында жалғасады. Жоба барысында ауданға қарасты барлық ауылдық округтердің өнерпаздары кезең-кезеңімен өнер көрсетіп, өздерінің шығармашылық бағдарламаларын көпшілік назарына ұсынатын болады.

Демек, алдағы сенбілерде де Жосалының орталық алаңы ән мен күйге бөленіп, ауданның өнерпаздары ел алдына шығады. Бұл – ауылдағы өнерді қолдап, ұлттық мәдениетті дәріптеудің және ел ішіндегі таланттарды танытудың жақсы дәстүрге айналған үлгісі.

Өнер бар жерде – рух бар. Ал ел арасындағы өнерді қолдау – ұлттық құндылықтарды сақтаудың маңызды жолдарының бірі.