Аудан әкімі Қуаңдария ауылында тұрғындарды жеке қабылдады

Қазақстан Республикасы Президентінің «Әкімдердің халықпен кездесулерін өткізу туралы» Жарлығына сәйкес аудан әкімі Жандос Еркінбек Қуаңдария ауылдық округінде тұрғындарды жеке мәселелері бойынша қабылдады. Қабылдау Қуаңдария ауылдық клуб үйінде өтіп, оған аудандық соттың төрағасы, құқық қорғау органдарының өкілдері, төтенше жағдайлар бөлімі мен Мемлекеттік кірістер басқармасының басшылары қатысты.

Азаматтардың өтініштері мен ұсыныстарын тыңдау, оларды толғандырған мәселелерді дер кезінде шешу мақсатында ұйымдастырылған қабылдауға 50-ге жуық тұрғын қатысты. Кездесу барысында ауыл тұрғындары өздерінің әлеуметтік-тұрмыстық және қоғамдық маңызы бар мәселелерін көтеріп, аудан басшылығына ұсыныс-пікірлерін жеткізді.

Қабылдау барысында тұрғындар негізінен жұмысқа орналасу, тұрғын үймен қамтамасыз ету, көше жарықтандыруы, инженерлік инфрақұрылым және әлеуметтік қолдау мәселелерін қозғады. Сонымен қатар елді мекендерді абаттандыру, жолдардың жай-күйі және коммуналдық қызметтердің сапасына қатысты ұсыныстар да айтылды.

Аудан әкімі әрбір азаматтың мәселесіне жеке тоқталып, тұрғындардың сұрақтарына заң аясында түсіндірме берді. Көтерілген мәселелер бойынша жауапты бөлім және мекеме басшыларына нақты тапсырмалар жүктеліп, олардың орындалуын бақылауға алу тапсырылды. Кейбір мәселелер бойынша тұрғындарға қабылдау барысында тиісті түсіндірмелер берілсе, қосымша зерделеуді қажет ететін өтініштер бойынша жауапты сала мамандарына нақты міндеттер жүктелді.

Жандос Еркінбек тұрғындармен ашық диалог орнату жергілікті атқарушы органдар жұмысының басты бағыттарының бірі екенін атап өтті. Оның айтуынша, халықтың ұсыныс-пікірлері мен көтерген мәселелері ауданның әлеуметтік-экономикалық дамуына қатысты маңызды шешімдер қабылдауда ескеріліп келеді.

Айта кету керек, биылғы жылдың бірінші тоқсанында аудан әкімі мен оның орынбасарларының қабылдауында жалпы 91 азамат болған. Оның ішінде 74 тұрғын жұмысқа орналасу мәселесі бойынша жүгінген. Қабылдау қорытындысы бойынша өтініш білдірген азаматтардың 53 пайызы тұрақты және қоғамдық жұмыс орындарына орналастырылып, тиісті қолдау шараларымен қамтылған.

Бұл көрсеткіштер аудан көлемінде халықты жұмыспен қамту бағытында атқарылып жатқан жұмыстардың нәтижесін көрсетеді. Сонымен қатар азаматтарды жұмыспен қамтуға бағытталған мемлекеттік бағдарламалар мен жобалар арқылы тұрғындардың әлеуметтік жағдайын жақсарту жұмыстары жүйелі түрде жалғасуда.

Жалпы аудан әкімінің тұрғындарды жеке қабылдауы бекітілген кестеге сәйкес тұрақты түрде өткізіліп келеді. Мұндай кездесулер халық пен билік арасындағы байланысты нығайтып, тұрғындардың өзекті мәселелерін уақытылы шешуге мүмкіндік береді.

Аудан басшылығы алдағы уақытта да азаматтардың өтініштері мен ұсыныстарын назардан тыс қалдырмай, тұрғындардың өмір сүру сапасын арттыруға бағытталған жұмыстарды жүйелі түрде жалғастыра бермек.