Әкімдік мәжілісінде цифрландыру, жасанды интеллект және санитарлық тазалық мәселелері талқыланды
Бүгін аудан әкімдігінің мәжіліс залында аудан әкімінің міндетін атқарушы Шерхан Есжановтың төрағалығымен әкімдік мәжілісі өтті. Жиынға дербес бөлім басшылары, қала, кент және ауылдық округ әкімдері, сондай-ақ жауапты мекеме жетекшілері қатысып, күн тәртібіндегі маңызды мәселелерді талқылады.
Мәжілісте Қазақстан Республикасы Үкіметі отырысының күн тәртібіне сәйкес экономика салаларына жасанды интеллект технологияларын енгізу мәселесі қаралды. Бұл бағыт қазіргі таңда мемлекеттік саясаттың басым бағыттарының бірі саналады және елдің цифрлық трансформациясын жеделдетуге арналған маңызды құрал ретінде қарастырылуда.
Мемлекет басшысы өткен жылғы Қазақстан халқына Жолдауында еліміздің толыққанды цифрлық мемлекетке айналуы стратегиялық басымдықтардың бірі екенін атап өткен болатын. Сонымен қатар, Президент бастамасымен 2026 жылдың «Цифрландыру және жасанды интеллект жылы» деп жариялануы осы саланың маңыздылығын айқындай түсті. Бұл өз кезегінде мемлекеттік органдар мен барлық деңгейдегі атқарушы билік құрылымдарына жаңа міндеттер жүктеп отыр.
Жиында аудан әкімінің міндетін атқарушы Шерхан Есжанов цифрлық технологияларды дамыту және жасанды интеллект жүйелерін мемлекеттік басқару саласына тиімді енгізу бағытында нақты тапсырмалар берді. Атап айтқанда, дербес бөлім басшылары мен барлық деңгейдегі әкімдерге Цифрлық технологияларды дамытудың 2026–2030 жылдарға арналған стратегиясында және цифрлық картада белгіленген міндеттердің сапалы әрі мерзімінде орындалуын қамтамасыз ету тапсырылды.
Сондай-ақ мемлекеттік қызмет көрсету сапасын арттыру, деректермен жұмыс істеу мәдениетін жетілдіру және басқару шешімдерін қабылдау кезінде заманауи цифрлық құралдарды кеңінен пайдалану мәселелеріне ерекше назар аударылды. Бұл ретте жасанды интеллекттің мүмкіндіктерін тиімді қолдану мемлекеттік басқарудың ашықтығы мен тиімділігін арттыруға ықпал ететіні атап өтілді.
Жиын барысында жасанды интеллект құралдарын пайдалану бойынша мемлекеттік қызметшілердің біліктілігін арттыру мәселесі де көтерілді. Аудан әкімінің міндетін атқарушы жауапты мекемелерге оқыту және түсіндіру жұмыстарын жандандырып, қызметкерлердің жаңа технологияларды меңгеру деңгейін арттыру бағытында жүйелі жұмыстар жүргізуді тапсырды.
Күн тәртібінде халықты сапалы байланыс және интернет желісімен қамтамасыз ету мәселесі де қаралды. Атап айтқанда, аудан тұрғындарының цифрлық қызметтерге қолжетімділігін арттыру, шалғай елді мекендердегі интернет сапасын жақсарту және байланыс инфрақұрылымын дамыту бағытындағы жұмыстардың барысы сараланды. Осыған байланысты жауапты сала басшыларына байланыс сапасын арттыру және тұрғындардың өтініштеріне жедел ден қою жөнінде нақты міндеттер жүктелді.
Мәжіліс барысында ауданның санитарлық тазалығы мәселесі де кеңінен талқыланды. Мемлекет басшысының бастамасымен жүзеге асырылып жатқан «Таза Қазақстан» республикалық экологиялық бағдарламасының орындалу барысы қаралып, атқарылып жатқан жұмыстарға талдау жасалды.
Жиында аудан бойынша бірқатар оң нәтижелер бар екені айтылғанымен, бағдарламаның кейбір бағыттары әлі де толық деңгейде орындалмай отырғаны атап өтілді. Әсіресе қала аумағындағы жекелеген көшелер мен қоғамдық орындарда анықталған санитарлық тазалыққа қатысты кемшіліктер назарға алынды.
Осыған байланысты аудан әкімінің міндетін атқарушы жауапты мекеме басшылары мен қала, кент және ауылдық округ әкімдеріне анықталған кемшіліктерді қысқа мерзімде жою жөнінде нақты тапсырмалар берді. Сонымен қатар тазалық жұмыстарын тұрақты бақылауда ұстап, тұрғындар арасында экологиялық мәдениетті қалыптастыру бағытындағы түсіндіру жұмыстарын күшейту қажеттігі айтылды.
Мәжілісті қорытындылаған Шерхан Есжанов цифрландыру, жасанды интеллект технологияларын енгізу, байланыс сапасын арттыру және санитарлық тазалықты қамтамасыз ету бағытындағы жұмыстар ауданның әлеуметтік-экономикалық дамуы үшін аса маңызды екенін атап өтті. Ол барлық жауапты тұлғаларға жүктелген міндеттердің сапалы әрі уақытылы орындалуын қамтамасыз етуді тапсырды.
Жиын қорытындысы бойынша көтерілген барлық мәселелер бақылауға алынып, тиісті тапсырмалардың орындалу барысы тұрақты түрде мониторинг жүргізілетін болады.
