Ұлттық домбыра күні әуежайда ерекше көңіл күймен аталып өтті

Ұлттық домбыра күніне орай қалалық мәдениет үйінің жас өнерпаздары әуежайда арнайы мерекелік концерттік бағдарлама ұсынып, жолаушылар мен қала қонақтарына ерекше рухани сый жасады. Күй күмбірі мен ұлттық әндер әуежай аумағын әсем әуенге бөлеп, сапарға аттанушылар мен өңірге келген меймандарға қазақ халқының төл өнерін жақыннан таныстыруға мүмкіндік берді.

Мерекелік шара барысында жас домбырашылар халық күйлерін орындап, ұлттық нақыштағы әндерді шырқап, көрермендердің ыстық ықыласына бөленді. Домбыраның қоңыр үні әуежайдағы ерекше атмосфераны одан әрі жандандырып, көпшілікке көтеріңкі көңіл күй сыйлады. Жолаушылар өнерпаздардың орындауындағы шығармаларды ықыласпен тыңдап, қол соғып қошемет көрсетті. Көптеген қонақтар естелік суретке түсіп, қазақтың ұлттық аспабы туралы жылы лебіздерін білдірді.

Іс-шараның негізгі мақсаты – ұлттық құндылықтарды дәріптеу, халқымыздың ғасырлар бойы жалғасып келе жатқан күйшілік дәстүрін кеңінен насихаттау, домбыра өнеріне деген қызығушылықты арттыру және өскелең ұрпақтың бойына ұлттық рух пен мәдени мұраға деген құрмет сезімін қалыптастыру. Сонымен қатар, мұндай мәдени шаралар өңірге келген шетелдік және отандық қонақтарға қазақ халқының бай мәдениеті мен өнерін таныстыруға ықпал етеді.

Домбыра – халқымыздың тарихы мен тағдырын, қуанышы мен мұңын, ерлігі мен елдігін ұрпақтан ұрпаққа жеткізіп келе жатқан киелі аспап. Сондықтан Ұлттық домбыра күні – тек өнер мерекесі ғана емес, ұлттық болмысымызды ұлықтайтын, рухани құндылықтарымызды жаңғыртатын маңызды күн.

Мерекелік бағдарламаның соңында көрермендер жас өнерпаздарға алғыстарын білдіріп, олардың өнеріне жоғары баға берді. Осындай тағылымды шаралар ұлттық өнердің өміршеңдігін айқындап, жас таланттардың шығармашылығына қолдау көрсетіп қана қоймай, қоғамда ұлттық мәдениетке деген қызығушылықтың арта түсуіне өз үлесін қосатыны сөзсіз.