ҰЛЫ ЖЕҢІС ШЕРУІНЕ ҚАНША ӘСКЕРИ ҚАТЫСАДЫ?

  Биыл екінші дүниежүзілік соғыстың аяқталғанына – 80 жыл. Ұлы Жеңіс мерекесіне орай Астанада мерекелік шеру өтеді. Шеруге 300 техника бірлігі, 4 мыңнан астам әскери қатысады деп күтілуде.

         Елордада өтетін шеруге 24 парадтық есеп шығады. Сарбаздар мен офицерлердің ішінде 200-і– әскери салада жүрген нәзік жандар. Мұнан бөлек, ауқымды шарада еліміздің заманауи әскери техникаларынан бастап бұрынғы тарихи үлгілері де көрермен назарына ұсынылады. Сонымен қоса әр түрлі типтегі 60-тан аса ұшу құралы әуеге көтеріледі.

          ҚР Қарулы Күштерінің жерүсті әскерлерінің Бас қолбасшысы Мереке Күлекбаевтың айтуынша, бүгінде шеруге дайындық қызу жүріп жатыр. Әскери бөлімдерде іріктеу және жаттығулар өткізілді. Қазір техникаларды Астанаға тасымалдау жұмыстары және бірлескен жаттығулар жүргізілуде.