Қызылордалық спортшы әлемдік Гран-при турнирінде жүлдегер болды

Қызылордалық спортшы халықаралық аренада тағы бір мәрте ел намысын абыроймен қорғап, жоғары нәтижеге қол жеткізді. 23-25 сәуір күндері Рабат қаласында пара жеңіл атлетикадан өткен халықаралық Гран-при турнирінде жерлесіміз Мақшат Мейіржан жүлделі орындарға ие болды.

Аталған байрақты бәсекеге әлемнің 57 елінен 500-ге жуық спортшы қатысып, өзара мықтыны анықтады. Халықаралық деңгейдегі бұл жарыс пара спортшылар үшін үлкен тәжірибе алаңы ғана емес, сонымен қатар алдағы ірі додаларға жолдама беретін маңызды кезеңдердің бірі саналады.

Турнир қорытындысы бойынша Мақшат Мейіржан ұзындыққа секіру дисциплинасында жоғары нәтиже көрсетіп, күміс медальді жеңіп алды. Сонымен қатар, ол 200 метр қашықтыққа жүгіруде де жақсы көрсеткіш көрсетіп, мәре сызығын үшінші болып кесіп, қола жүлдені иеленді. Бұл нәтижелер спортшының жан-жақты дайындығын және жоғары деңгейдегі бәсекеге қабілеттілігін айқын дәлелдейді.

Айта кету керек, Рабат қаласындағы бұл халықаралық Гран-при турнирі алдағы Пара жеңіл атлетикадан Азия ойындары алдындағы іріктеу кезеңдерінің бірі болып табылады. Сондықтан әрбір спортшы үшін бұл жарыстағы нәтиже аса маңызды. Мақшаттың жүлделі орындары оның алдағы додада ел намысын қорғауға мүмкіндік алатынын көрсетеді.

Спортшының жетістігінде оның жаттықтырушысы Юрий Мощеев еңбегі зор. Көпжылдық тәжірибесі бар маман шәкіртінің халықаралық деңгейде жоғары нәтиже көрсетуіне ықпал етіп келеді. Жүйелі жаттығу мен кәсіби дайындықтың арқасында спортшы өз мүмкіндігін толық пайдаланып, жоғары көрсеткіштерге қол жеткізуде.

Жалпы, пара жеңіл атлетика – ерекше күш-жігерді, табандылық пен қайсарлықты талап ететін спорт түрі. Мұндай жарыстарда топ жарып, жүлдегер атану – үлкен еңбек пен төзімділіктің нәтижесі. Мақшат Мейіржанның бұл жетістігі өңір спортының дамуына да оң серпін беріп, жас спортшыларға үлгі болары сөзсіз.

Қызылордалық жанкүйерлер мен спорт қауымдастығы спортшымыздың жеңісін зор мақтанышпен қабылдап, оған алдағы жарыстарда да сәттілік тілейді. Халықаралық аренада көк туымызды биікке көтеріп жүрген спортшылардың қатары арта берсін деген тілек бар.