Құрылыс саласына жаңа жетекші келді
Қызылорда қаласында кадрлық өзгерістерге қатысты маңызды мәжіліс өтіп, бірқатар жаңа тағайындаулар мен марапаттар жария етілді. Қала әкімі Нұржан Ахатовтың төрағалығымен өткен жиында қалалық құрылыс бөлімінің жаңа басшысы таныстырылып, саладағы алдағы міндеттер айқындалды.
Жиын барысында қалалық құрылыс бөлімінің басшысы лауазымына тағайындалған Мүбәрәк Ердәулет Бекмұратұлы ресми түрде таныстырылды. Шаһар басшысы жаңа басшының кәсіби білімі мен еңбек тәжірибесіне тоқталып, оған жауапты қызметінде табыс тіледі.
Ердәулет Бекмұратұлы Қызылорда облысында дүниеге келген. Ол жоғары білімді маман ретінде «Сәулет және құрылыс» және «Құқық» мамандықтары бойынша білім алған. Бұл өз кезегінде оның құрылыс саласындағы басқарушылық және құқықтық мәселелерді қатар меңгергенін көрсетеді.
Еңбек жолын 2017 жылы жеке секторда бастап, «НС және К Сервис» жауапкершілігі шектеулі серіктестігінде директордың орынбасары қызметін атқарған. Кейін мемлекеттік қызметке ауысып, 2019 жылдан бастап қалалық сәулет және қала құрылысы саласында түрлі лауазымдарда еңбек етті. Атап айтқанда, статист, бас маман, қала әкімінің көмекшісі, сондай-ақ қалалық жұмыспен қамту және әлеуметтік бағдарламалар бөлімі басшысының орынбасары қызметтерін абыроймен атқарды. 2025 жылдан бері қалалық сәулет және қала құрылысы бөлімінің басшысы ретінде жұмыс істеп, салада жинақтаған тәжірибесін жаңа қызметінде жалғастырмақ.
Қала әкімі өз сөзінде құрылыс саласының қала дамуы үшін стратегиялық маңызға ие екенін атап өтіп, жаңа басшыға нақты міндеттер жүктелетінін жеткізді. Әсіресе, сапалы құрылыс, инфрақұрылымды дамыту және қала келбетін заманауи талаптарға сай қалыптастыру бағытындағы жұмыстарды жүйелі жүргізу қажеттігі айтылды.
Сонымен қатар, мәжіліс барысында мәдениет саласының өкілдері де назардан тыс қалмады. Бұған дейін қалалық Жастар театрының директоры қызметін атқарған Мансұр Нұрмат Абдуллаұлына шаһардың ең жоғары марапаттарының бірі – «Құрмет грамотасы» табысталды.
Мансұр Абдуллаұлы театр басшысы ретінде ұжымның шығармашылық әлеуетін арттыруға айрықша үлес қосты. Оның жетекшілігімен театр репертуары мазмұнды әрі заманауи қойылымдармен толықтырылып, жас таланттардың сахнада өзін көрсетуіне кең мүмкіндік жасалды. Өнер ұжымының дамуына серпін берген оның еңбегі жоғары бағаланып отыр.
Жиын қорытындысында қала әкімі кадрлық өзгерістердің басты мақсаты – салалардың тиімділігін арттыру және қаланың дамуына жаңа серпін беру екенін атап өтті. Сонымен қатар, мемлекеттік қызметшілердің кәсібилігі мен жауапкершілігі әрдайым басты назарда болатыны жеткізілді.
