Еңбек еріне тағзым: Төлеген Әлімбетовтің 100 жылдығына арналған тағылымды кеш өтті

Бүгін аудандық мәдениет үйінде Социалистік Еңбек Ері, Арал өңірінің мақтанышы, даңқты балықшы капитан Төлеген Әлімбетовтің туғанына 100 жыл толуына арналған «Теңізбен тілдескен, толқынмен бірге өскен» атты еске алу кеші өтті. Тағылымы мол шараға ардагерлер, зиялы қауым өкілдері, еңбек ардагерлері, жастар және аудан тұрғындары қатысып, ел дамуына өлшеусіз үлес қосқан еңбек адамының жарқын бейнесіне тағзым етті.

Кеш басталмас бұрын мәдениет үйінің фойесінде арнайы ұйымдастырылған көрме көпшілік назарына ұсынылды. Көрмеде Арал балықшыларының тыныс-тіршілігін бейнелейтін тарихи фотосуреттер, Төлеген Әлімбетовтің еңбек жолына қатысты архивтік құжаттар, марапаттары, естелік материалдар және оның өмірі мен қызметін қамтитын кітаптар қойылды. Жиналған қауым көрме арқылы өткен ғасырдағы балық шаруашылығының дамуы мен өңір тарихынан сыр шерткен құнды деректермен танысты.

Салтанатты кештің шымылдығы театрландырылған прологпен ашылды. Көркем қойылымда Төлеген Әлімбетовтің балалық шағы, еңбек жолының басталуы, теңіз төсіндегі қажырлы қызметі мен кәсіби жетістіктері сахналық көріністер арқылы әсерлі бейнеленді.

1926 жылы Арал өңірінде дүниеге келген Төлеген Әлімбетов жастайынан еңбекке араласып, теңіз тіршілігінің қыр-сырын меңгерді. Ол балық шаруашылығы саласында ерекше табандылық пен жауапкершілік танытып, кәсіби шеберлігі арқасында өз заманының таңдаулы мамандарының біріне айналды. Әсіресе әйгілі «Ленинград» кемесінің штурманы ретінде еңбек етіп, өндірістік көрсеткіштердің артуына және балық шаруашылығының дамуына зор үлес қосты. Оның батылдығы, ұйымдастырушылық қабілеті мен жаңашыл бастамалары әріптестері арасында зор құрметке ие болды.

Тағылымды кеш барысында аудан әкімінің орынбасары Нұржан Бохаев сөз сөйлеп, қатысушыларды айтулы мерейтоймен құттықтады. Ол өз сөзінде Төлеген Әлімбетовтің есімі тек Арал өңірі үшін ғана емес, бүкіл ел үшін еңбек адамының жарқын үлгісі екенін атап өтті.

– Төлеген Әлімбетовтің бүкіл ғұмыры адал еңбек пен елге қызмет етудің жарқын үлгісі болды. Ол өз ісіне деген шексіз сүйіспеншілігі мен жауапкершілігінің арқасында биік белестерді бағындырды. Оның есімі мен еңбегі келер ұрпаққа әрдайым өнеге болып қала береді, – деді аудан әкімінің орынбасары.

Сондай-ақ ол еңбек ерінің мемлекет тарапынан жоғары бағаланғанын атап өтті.

– Ерен еңбегі мемлекет тарапынан жоғары бағаланып, 1966 жылы «Ленин» орденімен марапатталды. Ал 1971 жылы Социалистік Еңбек Ері атағы берілді. Бұл – тек бір адамның жетістігі ғана емес, тұтас Арал өңірінің абыройын асқақтатқан тарихи жетістік, – деді Нұржан Бохаев.

Кеш барысында аудандық ардагерлер кеңесінің төрағасы Әбдіғаппар Әйімбетов сөз алып, еңбек ардагерімен бірге өткен жылдардан сыр шертті. Ол Төлеген Әлімбетовтің қарапайымдылығы, адамгершілік қасиеттері, еңбекқорлығы мен ұйымдастырушылық қабілеті туралы тебіреніспен әңгімелеп, оның өнегелі өмір жолы кейінгі буын үшін үлкен мектеп екенін жеткізді.

Сонымен қатар ел ағалары Жұбандық Әлішов пен Болатбек Қожанов та сахна төріне көтеріліп, теңіз үстінде бірге өткізген жылдардан әсерлі естеліктер айтты. Олар балықшылар өмірінің қиындықтары мен қызықтары, теңіздегі еңбектің жауапкершілігі және Төлеген Әлімбетовтің әріптестері арасындағы беделі жөнінде кеңінен әңгімеледі. Жүрекжарды естеліктер кештің мазмұнын тереңдетіп, көрермендерді өткен дәуірдің тынысымен қауыштырды.

Мәдени бағдарлама аясында туған жер, теңіз және еңбек тақырыптарына арналған әндер шырқалып, күйлер орындалды. Аудан өнерпаздарының орындауындағы музыкалық композициялар көрермендерге ерекше әсер сыйлап, кештің рухани мазмұнын байыта түсті.

Кештің ең әсерлі сәттерінің бірі – Төлеген Әлімбетовтің ұлы Жадырас Әлімбетовтің сөз сөйлеуі болды. Ол әкесінің өмірлік ұстанымдары, отбасы тәрбиесі, еңбекке деген құрметі мен адамгершілік қасиеттері туралы естеліктерімен бөлісті.

Өз сөзінде ол әке аманатына адал болудың маңызын айтып, бүгінгі ұрпаққа еңбек пен жауапкершіліктің қадірін түсіндіру әрбір отбасының міндеті екенін атап өтті. Оның шынайы әрі жүрекке жеткен лебізі залдағы көрермендерге ерекше әсер қалдырды.

Төлеген Әлімбетовтің ғасырлық мерейтойына арналған бұл кеш тек бір тұлғаның өмір жолын еске алу ғана емес, тұтас бір дәуірдің еңбек тарихына тағзым ету болды. Сонымен қатар бұл шара жас ұрпаққа адал еңбек пен елге қызмет етудің маңызын насихаттап, тарихи жадымызды жаңғыртуға бағытталған маңызды мәдени-рухани іс-шараға айналды.

Еңбек адамына көрсетілген құрмет – қоғамның кемелдігінің белгісі. Ал Төлеген Әлімбетов сынды тұлғалардың өнегелі ғұмыры мен еңбек жолы алдағы уақытта да талай буынға бағыт-бағдар беретін өмірлік мектеп болып қала бермек.