Аралдықтар Ұлы Отан соғысы құрбандарын еске алды

Бүгін Арал ауданында 9 мамыр – Жеңіс күніне орай Ұлы Отан соғысында қаза тапқан жауынгерлерді еске алуға арналған тағзым ету рәсімі өтті. Ерлік пен елдік рухын ұлықтаған шараға аудан тұрғындары, ардагерлер, мемлекеттік мекеме қызметкерлері, жастар ұйымдарының өкілдері мен зиялы қауым қатысты.

Таңертең аудан орталығындағы «Тағзым» алаңына жиналған көпшілік сұрапыл соғыс жылдарында Отан үшін от кешіп, майдан даласында ерлікпен қаза тапқан боздақтардың рухына тағзым етті. Жиналған қауым соғыс құрбандарын бір минут үнсіздікпен еске алып, олардың жарқын рухына арнап Құран бағыштады.

Тағзым рәсімі барысында Ұлы Жеңістің тарихи маңызы мен бейбіт өмірдің қадір-қасиеті туралы тағылымды ойлар айтылып, майдангерлердің жанқиярлық ерлігі ұрпақ жадында мәңгі сақталатыны атап өтілді.

Салтанатты шарада аудан әкімінің орынбасары Нұрмұхаммед Бохаев сөз сөйлеп, аудан тұрғындарын Жеңіс күнімен құттықтады.

Өз сөзінде ол 9 мамырдың тек тарихи дата ғана емес, халықтың жүрегінде сақталған қасиетті күн екенін атап өтті.

– Қадірлі жерлестер! Баршаңызды Ұлы Жеңістің 81 жылдығымен шын жүректен құттықтаймын. 9 мамыр – адамзат тарихындағы ең сұрапыл соғыстың аяқталғанын білдіретін ерекше күн. Бұл – ерлік пен өрліктің, батырлық пен төзімділіктің символына айналған қасиетті мереке.

Ұлы Отан соғысы жылдары миллиондаған адам майдан даласында ерлік көрсетіп, бейбіт өмір мен азат болашақ үшін жанын қиды. Біз бүгін сол батырлардың алдында мәңгі қарыздармыз. Олардың ерлігі мен жанқиярлығының арқасында бүгінгі бейбіт күнге жеттік.

Тарихта ешқашан ұмытылмайтын, халықтың жүрегінде мәңгі сақталатын күндер болады. Жеңіс күні – сондай қастерлі күндердің бірі. Бұл – өткенді еске алып қана қоймай, одан тағылым алатын күн. Біз батыр бабаларымыздың ерлігін ұлықтап, олардың аманатына адал болуымыз керек.

Бүгінгі тәуелсіз еліміздің бейбіт өмірі мен тұрақтылығы – сол майдангерлердің ерлігі мен тыл еңбеккерлерінің қажырлы еңбегінің нәтижесі. Сондықтан бейбітшіліктің қадірін біліп, ел бірлігін сақтап, мемлекетіміздің дамуына үлес қосу – әрбір азаматтың міндеті.

Еліміз аман, жұртымыз тыныш, көк туымыз көкте желбірей берсін. Бірлігіміз бекем, тәуелсіздігіміз тұғырлы болсын, – деді Нұрмұхаммед Омарұлы.

Шара барысында соғыс жылдарындағы қазақстандықтардың майдандағы және тылдағы жанқиярлық еңбегі ерекше аталып өтті. Қан майданға аттанып, туған жерге оралмаған мыңдаған боздақтардың есімі құрметпен еске алынды.

Ұлы Отан соғысы жылдары Арал өңірінен де мыңдаған азамат майданға аттанып, олардың көпшілігі туған жерге қайта оралмады. Олар көрсеткен ерлік пен батырлық бүгінгі ұрпақ үшін патриотизмнің, елге деген сүйіспеншіліктің жарқын үлгісі болып қала береді.

Тағзым ету рәсімінің соңында қатысушылар майдан даласында қаза тапқан жауынгерлерге арналған ескерткіш тақта мен Мәңгілік алауға гүл шоқтарын қойды. Гүл қою рәсімі кезінде соғыс құрбандарының рухына тағзым етіліп, олардың есімдері тағы бір мәрте құрметпен аталды.

Мәңгілік алау жанындағы үнсіздік пен тағзым көрінісі бейбіт өмірдің бағасын терең сезіндіре түсті. Бұл сәт қатысушылардың жүрегінде ерекше әсер қалдырып, батырлар рухына деген құрметтің ешқашан жоғалмайтынын көрсетті.

Жеңіс күніне арналған еске алу шарасы ел тарихындағы ұлы ерлікті ұлықтап, жас ұрпақтың бойына отансүйгіштік рухты сіңіруге бағытталған маңызды тағылымдық іс-шаралардың бірі болды. Батыр бабалардың ерлігі мен жанқиярлығы халық жадында мәңгі сақталып, келер ұрпаққа өнеге болып қала бермек.