Аралдық спортшылар ел чемпионатында жоғары нәтиже көрсетті

Аудан спортшылары жыл көлемінде Қазақстан Республикасының чемпионаттары мен республикалық деңгейдегі ірі жарыстарда табысты өнер көрсетіп, туған өлкенің мерейін үстем етті. Түрлі спорт түрлері бойынша ел біріншіліктерінде бақ сынаған жерлестеріміз жоғары нәтижелерге қол жеткізіп, аудан спортының әлеуеті мен спортшылардың дайындық деңгейінің жоғары екенін тағы бір мәрте дәлелдеді.

Бүгінде мемлекет тарапынан бұқаралық спортты дамытуға, жас спортшыларды қолдауға және спорт инфрақұрылымын жетілдіруге ерекше көңіл бөлінуде. Соның нәтижесінде аудан спортшылары республикалық деңгейдегі жарыстарда тұрақты түрде жүлделі орындарға ие болып, өңір спортының дамуына зор үлес қосып келеді.

Жыл ішінде өткен Қазақстан Республикасының чемпионаттарында аудан спортшылары спорттың бірнеше түрінен үздік нәтижелер көрсетіп, жеңіс тұғырынан көрінді.

Атап айтқанда, таеквондо спортынан өткен Қазақстан Республикасының чемпионатында З. Қажымұқан қола жүлдеге ие болып, ІІІ орынды иеленді. Ал 3х3 баскетболдан ұйымдастырылған Қазақстан Республикасының чемпионатында Д. Шаңбай жоғары шеберлік танытып, жарыстың қола жүлдегері атанды.

Грек-рим күресі бойынша өткен ел чемпионаттары аудан спорты үшін ерекше табысты болды. U-17 жасөспірімдер арасындағы Қазақстан Республикасының чемпионатында М. Махамбет қарсыластарынан басым түсіп, чемпион атанып, алтын медаль иеленді.

Сонымен қатар U-20 жастар арасындағы Қазақстан Республикасының чемпионатында Ә. Кабулов пен А. Болатұлы жоғары нәтижеге қол жеткізіп, ел чемпионы атағын жеңіп алды. Бұл жеңістер аудандағы күрес мектебінің қалыптасқан жүйесі мен жаттықтырушылар еңбегінің жемісі екенін айқын көрсетті.

Әйелдер күресі бойынша өткен Қазақстан Республикасының чемпионатында Р. Жамсапқызы финалдық кезеңге дейін сүрінбей жетіп, жарыстың күміс жүлдегері атанып, ІІ орынды иеленді.

Гір спорты бойынша ұйымдастырылған Қазақстан Республикасының чемпионаттарында да аудан спортшылары табысты өнер көрсетті. Атап айтқанда, Н. Бахиев, С. Қартбайұлы, Қ. Байназаров, Қ. Разақов, А. Өмірбаева және М. Махамбетов өз салмақ дәрежелерінде жоғары нәтиже көрсетіп, чемпионаттың күміс жүлделерін жеңіп алды.

Ал А. Бектай, Э. Қарабекұлы, І. Алтынбекқызы, Г. Бахиева, Т. Есентүгелов және Ғ. Жаңаберген ел чемпионаттарының қола жүлдегерлері атанып, ІІІ орынға ие болды. Бұл көрсеткіштер аудан спортшыларының аталған спорт түріндегі әлеуетінің жоғары екенін көрсетеді.

Бокс спортынан өткен Қазақстан Республикасының чемпионатында А. Оразғалиева күміс жүлдеге ие болып, ІІ орынды иеленсе, Ж. Уткелбаева үздік үштіктен көрініп, чемпионаттың қола жүлдесін жеңіп алды.

Еркін күрестен ұйымдастырылған Қазақстан Республикасының чемпионатында М. Болатбеков жоғары нәтиже көрсетіп, жарыстың ІІІ орын жүлдегері атанды.

Ал командалық спорт түрлері бойынша да аудан спортшылары жақсы жетістіктерге қол жеткізді. Гандболдан өткен Қазақстан Республикасының чемпионатында Ә. Марат жеңімпаз атанып, І орын иеленіп, аудан намысын абыроймен қорғады.

Спортшылардың бұл жетістіктері олардың қажырлы еңбегі мен табанды дайындығының нәтижесі ғана емес, сонымен қатар жаттықтырушылардың кәсіби шеберлігі мен спорт саласына көрсетіліп жатқан қолдаудың жемісі болып табылады.

Бүгінде аудан көлемінде спортпен тұрақты шұғылданатын жастар саны артып келеді. Заманауи спорт нысандарының салынуы, бұқаралық спортты дамытуға бағытталған жұмыстардың жүйелі жүргізілуі және тәжірибелі бапкерлердің еңбегі жас спортшылардың жоғары нәтижелерге қол жеткізуіне мүмкіндік беруде.

Жыл қорытындысындағы бұл жетістіктер аудан спортының даму қарқынының жоғары екенін айқын көрсетеді. Алдағы уақытта да жергілікті спортшылардың республикалық және халықаралық жарыстарда табысты өнер көрсетіп, аудан мен ел намысын абыроймен қорғай беретініне сенім мол.

Спортшылардың жеңісті жолы жас ұрпаққа үлгі болып, бұқаралық спорттың дамуына тың серпін бермек.