Аудан әкімі «Шағала» лагерінің жазғы маусымға дайындығымен танысты

Бүгін аудан әкімі Алмасбек Есмаханов Қазалы қаласында орналасқан «Шағала» балаларды сауықтыру демалыс орталығына арнайы барып, лагерьдің жазғы тынығу маусымына дайындық жұмыстарымен танысты. Жұмыс сапары барысында аудан басшысы демалыс орталығының материалдық-техникалық базасын, балалардың қауіпсіздігі мен жайлы демалысын қамтамасыз ету бағытында атқарылып жатқан жұмыстарды көріп, жауапты сала басшыларына нақты тапсырмалар берді.

Аудан әкімі алдымен лагерь аумағын аралап, балалардың жазғы демалысын ұйымдастыруға арналған негізгі нысандардың жағдайын бақылады. Атап айтқанда, бассейннің, жатын корпустарының, мәдени-көпшілік іс-шаралар өткізілетін сахнаның және асхананың қазіргі жай-күйімен танысты. Сонымен қатар ғимараттардың санитарлық жағдайы мен қауіпсіздік талаптарына сәйкестігіне назар аударды.

Биылғы жылы балалардың сапалы әрі қауіпсіз демалуына қолайлы жағдай жасау мақсатында лагерьге қажетті қаржы бөлініп, бірқатар жұмыстар қолға алынған. Қазіргі таңда демалыс орталығында ағымдағы жөндеу жұмыстары жүргізіліп, ғимараттар мен нысандарды жаңарту бағытындағы жұмыстар кезең-кезеңімен жүзеге асырылуда.

Тынығушылардың қауіпсіздігін қамтамасыз ету мақсатында лагерь аумағына заманауи талаптарға сәйкес 32 бейнебақылау камерасы орнатылып, кіру-шығу тәртібін бақылауға арналған арнайы турникет жүйесі іске қосылуда. Бұл шаралар балалардың қауіпсіздігін күшейтіп, лагерь аумағындағы қоғамдық тәртіпті қамтамасыз етуге мүмкіндік береді.

Сонымен қатар демалыс орталығында санитарлық жағдайды жақсарту мақсатында қосымша екі сыртқы әжетхана салу жұмыстары жүргізілуде. Аталған нысандар іске қосылғаннан кейін балалар мен қызметкерлер үшін қолайлы жағдай қалыптасады.

Лагерь аумағын абаттандыру жұмыстары да назардан тыс қалмаған. Қазіргі таңда орталықта көркейту-көгалдандыру жұмыстары жүргізіліп, ағаштар мен гүл көшеттері отырғызылуда. Сондай-ақ аумақты таза ұстау және санитарлық талаптарды сақтау мақсатында жүйелі түрде тазалық жұмыстары ұйымдастырылуда.

Жұмыс барысымен танысқан аудан әкімі балалардың жазғы демалысын сапалы ұйымдастыру маңызды міндеттердің бірі екенін атап өтті. Осыған байланысты аудандық білім бөлімінің басшысы мен демалыс орталығының директорына жазғы маусым басталғанға дейін барлық жөндеу және дайындық жұмыстарын толық аяқтап, нысандардың қауіпсіздігі мен санитарлық жағдайын қамтамасыз етуді тапсырды.

Сондай-ақ аудан басшысы лагерь қызметкерлеріне балалардың денсаулығы мен қауіпсіздігіне ерекше жауапкершілікпен қарау қажеттігін айтып, әрбір демалушы үшін қолайлы әрі қауіпсіз орта қалыптастырудың маңыздылығына тоқталды.

Айта кетейік, биыл «Шағала» балаларды сауықтыру демалыс орталығы дәстүрлі түрде 7 ауысым бойынша жұмыс істейді. Әр ауысымда 125 оқушыдан қабылданып, жалпы саны 875-ке жуық бала жазғы тынығумен қамтылады деп жоспарлануда. Балаларды қабылдау 1 маусымнан басталып, жаз мезгілі бойы жалғасады.

Жазғы сауықтыру маусымында балалар үшін түрлі мәдени-танымдық, спорттық және тәрбиелік іс-шаралар ұйымдастырылып, олардың бос уақытын тиімді өткізуге ерекше көңіл бөлінеді. Бұл өз кезегінде оқушылардың денсаулығын нығайтып қана қоймай, шығармашылық қабілеттерін дамытуға және жаңа достар табуына мүмкіндік береді.

Жалпы алғанда, «Шағала» балаларды сауықтыру демалыс орталығында жазғы маусымға дайындық жұмыстары жоспарға сәйкес жүргізілуде. Алдағы уақытта барлық жұмыстар толық аяқталып, балалардың қауіпсіз әрі мазмұнды демалысын ұйымдастыруға қажетті жағдайлар жасалмақ.