Ұлы Жеңіс күніне орай тыл ардагерлеріне құрмет көрсетілді
9 мая, 2026, 15:47
37
Бүгін Ұлы Жеңіс күні мерекесіне орай аудан әкімі Алмасбек Есмаханов аудандық мәслихат төрағасы Ғазиз Әліш және құқық қорғау органдарының басшыларымен бірге тыл ардагерлерінің шаңырақтарына арнайы барып, мерекемен құттықтады.
Сұрапыл соғыс жылдарында тылда тынымсыз еңбек етіп, Жеңісті жақындатуға өлшеусіз үлес қосқан ардагерлерге құрмет көрсетіліп, сый-сияпат табысталды. Ел басына күн туған ауыр кезеңде еңбек майданына араласқан аға буынның ерлігі мен төзімі бүгінгі ұрпақ үшін тағылымды өнеге екені атап өтілді.
Аудан басшысы алдымен Әйтеке би кентінде тұратын 90 жастағы тыл ардагері Қаным Құрманбаева мен Ұлы Отан соғысы ардагерінің жары, тыл ардагері Қанымкүл Оспанованың шаңырағына барып, мерекелік лебізін жеткізді. Сондай-ақ Жалаңтөс батыр ауылындағы тыл және еңбек ардагері Дәуіт Сайын мен Қазалы қаласында тұратын Мәлік ақсақалдың үйіне арнайы барып, құрмет көрсетті.
Кездесу барысында аудан әкімі тыл еңбеккерлерінің Жеңіс жолындағы еңбегі ешқашан ұмытылмайтынын атап өтті. Майдан даласына қажетті азық-түлік пен киім-кешекті қамтамасыз етіп, күн-түн демей еңбек еткен тыл ардагерлерінің қажырлы еңбегі бейбіт өмірдің берік негізі болғаны айтылды.
Сондай-ақ ел ағаларының өнегелі ғұмыры, ұрпақ тәрбиесіне қосқан үлесі мен ел бірлігін сақтаудағы парасаты ерекше құрметке лайық екені жеткізілді. Ақ жаулықты аналар мен ақсақалдардың батасы – елдің берекесі мен ырысының бастауы екені атап өтілді.
Өз кезегінде ардагерлер көрсетілген құрметке ризашылықтарын білдіріп, ел амандығы мен жұрт тыныштығын тілеп, ақ баталарын берді.
