Қорқыт ата университетінің өнерпаз жастары қала күніне мерекелік кеш сыйлады

Қызылорда қаласының күніне арналған мерекелік шаралар легі 12 қыркүйектен бастау алып, шаһардың әрбір мөлтек ауданында жалғасып келеді. Мерекелік бағдарлама аясында тұрғындар мен қала қонақтарына түрлі мәдени-көпшілік шаралар ұсынылып, өнерпаздар өз шығармашылығын ортаға салуда.

Кеше Орталық алаңда Қорқыт ата атындағы Қызылорда университетінің өнерпаз жастары «Мерейлі мерекеңмен, Қызылорда!» атты мерекелік концерт ұйымдастырды. Кешке қала тұрғындары мен жастар жиналып, өнерлі студенттердің дайындаған концерттік бағдарламасын тамашалады.

Шараның негізгі мақсаты – Сыр өңірінің тарихы мен мәдениетін кеңінен насихаттау, туған жерге деген сүйіспеншілікті арттыру және жастардың шығармашылық бастамаларына қолдау көрсету. Сонымен қатар мерекелік кеш арқылы Қызылорданың өткені мен бүгініне деген мақтаныш сезімін қалыптастыру көзделді.

Кеш барысында университеттің өнерлі студенттері сахна төрінде өз өнерлерін ортаға салды. Әншілер туған жерге, Сыр еліне арналған патриоттық және лирикалық шығармаларды орындап, көрерменге көтеріңкі көңіл күй сыйлады. Әсем әнге түрлі би композициялары ұласып, сахнадағы мерекелік атмосфераны одан әрі жандандыра түсті.

Жастардың әрбір өнер көрсетуі көрерменнің ыстық ықыласына бөленді. Әсіресе туған жерді арқау еткен әндер кештің мазмұнын айқындай түсіп, Қызылордаға деген ерекше құрмет пен сүйіспеншілікті жеткізді.

Мұндай мәдени шаралар жастардың шығармашылық қабілетін шыңдап қана қоймай, олардың туған өлкеге деген азаматтық ұстанымын қалыптастыруға да ықпал етеді. Өнер арқылы тарихты танып, туған жердің қадірін дәріптеу – ұрпақ сабақтастығын нығайтудың маңызды тетіктерінің бірі.

Сыр елінің бас шаһары тағы бір жылын абыроймен қарсы алып отыр. Қала күніне арналған мерекелік шаралар алдағы күндері де жалғасып, тұрғындарға көтеріңкі көңіл күй мен жақсы әсер сыйлай бермек.

Қаламыздың мерейлі мерекесі – барша Сыр жұртына ортақ қуаныш! Туған жеріміз көркейіп, Қызылорданың абыройы асқақтай берсін!