Қала күніне арналған мерекелік шаралар жалғасын табуда
Қызылорда қаласының күніне арналған мерекелік шаралар шаһардың әр аумағында жалғасып келеді. Мерекелік бағдарлама аясында Болашақ университетінің өнерпаз жастары да өз өнерлерін ортаға салып, қала тұрғындары мен қонақтарына концерттік бағдарлама ұсынды.
Мерекелік кеште университеттің талантты жастары ән мен биді үйлестірген мазмұнды бағдарлама дайындады. Сахна төрінде патриоттық және эстрадалық әндер шырқалып, түрлі жанрдағы би композициялары көрермен назарына ұсынылды.
Жас өнерпаздардың орындауындағы әрбір шығарма туған жерге деген сүйіспеншілікті, елге деген құрметті және Қызылордаға деген ыстық ықыласты жеткізді. Әсем әуен мен ырғақты билер мерекелік кештің көркін қыздырып, көрерменге көтеріңкі көңіл күй сыйлады.
Концерт барысында өнерпаз жастар өздерінің шығармашылық қабілеті мен сахналық шеберлігін көрсетіп, көрерменнің ыстық ықыласына бөленді. Жиналған көпшілік жас таланттарды қошеметпен қолдап, мерекелік кештің әсерлі өтуіне үлес қосты.
Қала күні – туған шаһардың тарихын дәріптеп, оның бүгінгі тыныс-тіршілігі мен жетістіктерін атап өтетін айтулы мереке. Осыған орай ұйымдастырылып жатқан мәдени шаралар қала тұрғындарының басын қосып, мерекелік көңіл күйді еселей түсуде.
Болашақ университеті өнерпаздарының концерті де Қызылорданың мерейлі мерекесіне арналған мәдени шаралардың қатарын толықтырып, қала тұрғындарына әсем ән мен әсерлі биден өрілген жақсы көңіл күй сыйлады.
