Ақжар ауылының көшелері күрделі жөндеуден өтті
ҚАРМАҚШЫ. Ақжар ауылдық округінде жол инфрақұрылымын жақсарту және тұрғындарға қолайлы жағдай жасау бағытындағы жұмыстар кезең-кезеңімен жүзеге асырылып келеді. Соның бірі – ауылдағы негізгі көшелердің бірі саналатын Ораз ахун және Ж.Тұяқбаев көшелеріне жүргізілген күрделі жөндеу жұмыстары.
Аталған жобаны іске асыруға облыстық бюджеттен қаржы бөлініп, құрылыс жұмыстарын «Жаңақорған Жібек жолы» ЖШС мердігер мекемесі атқарды.
Жоба аясында жалпы ұзындығы 1,360 шақырым Ораз ахун көшесі мен 1,140 шақырым Ж.Тұяқбаев көшесіне күрделі жөндеу жүргізілді. Көше жолдарын жаңарту жұмыстары 2026 жылдың маусым айында толық аяқталды.
Күрделі жөндеу барысында жолдардың жүруге қолайлы жағдайын қалыптастыруға басымдық берілді. Жаңартылған көшелер енді ауыл тұрғындарының қауіпсіз әрі кедергісіз қозғалуына мүмкіндік береді.
Жол сапасының жақсаруы – ауыл тұрғындарының күнделікті тұрмысына тікелей әсер ететін маңызды фактор. Әсіресе жедел жәрдем, өрт сөндіру, коммуналдық және басқа да арнайы қызмет көліктерінің елді мекен ішінде еркін қатынауы үшін сапалы жол инфрақұрылымының маңызы зор.
Сонымен бірге жөндеуден өткен көшелер ауылдың жалпы көркін жақсартып, елді мекеннің абаттандырылуына да оң ықпал етеді. Тұрғындардың қауіпсіз жүріп-тұруына жағдай жасау – ауыл инфрақұрылымын дамытудың негізгі бағыттарының бірі.
Ақжар ауылындағы бұл жоба елді мекендердегі жол сапасын кезең-кезеңімен жақсартуға бағытталған жұмыстардың бір бөлігі. Ауыл ішіндегі көшелерді жаңарту арқылы тұрғындардың тұрмыс сапасын арттырумен қатар, елді мекеннің инженерлік және көлік инфрақұрылымын дамытуға мүмкіндік берілуде.
Жолдың сапасы – ауылдың әлеуметтік ахуалы мен даму деңгейін айқындайтын маңызды көрсеткіштердің бірі. Сондықтан алдағы уақытта да ауданға қарасты елді мекендердегі жолдарды жаңарту, күрделі және орташа жөндеу жұмыстарын жүргізу, көлік қатынасының қауіпсіздігін қамтамасыз ету бағытындағы жұмыстар жалғасын табады.
Ақжардағы Ораз ахун және Ж.Тұяқбаев көшелерінің жаңаруы – ауыл тұрғындарының көптен күткен мәселелерінің бірінің шешімін табуына мүмкіндік беріп, елді мекеннің инфрақұрылымын жақсартуға жасалған нақты қадам болды.
