Құрметті қала тұрғындары мен қонақтары!
Қазіргі таңда қаладағы негізгі көлік артерияларының бірі саналатын Н.Назарбаев даңғылы мен А.Иманов көшесінде жол инфрақұрылымын жақсарту мақсатында қайта жаңғырту жұмыстары қарқынды жүргізілуде. Аталған жұмыстардың басты мақсаты – жол сапасын арттыру, көлік қозғалысының қауіпсіздігі мен қолайлылығын қамтамасыз ету, сондай-ақ қала ішіндегі көлік ағынын тиімді реттеу.
Жол жөндеу жұмыстары барысында ескі асфальт жабындылары алынып, оның орнына заманауи талаптарға сай жаңа жол қабаты төселуде. Сонымен қатар, жол жиегі ретке келтіріліп, инженерлік желілерді жаңарту және жол белгілерін жаңарту жұмыстары да қатар жүргізілуде.
Осыған байланысты уақытша көлік қозғалысына шектеулер енгізіліп отыр. Атап айтқанда, Тасбөгет кентіне қатынайтын көлік құралдары үшін балама бағыт ретінде Тәуелсіздік көшесіндегі көпір арқылы жүру ұсынылады. Бұл бағыт көлік ағынын реттеп, жөндеу жұмыстарының қауіпсіз әрі тиімді жүргізілуіне мүмкіндік береді.
Сондай-ақ, Қызылорда облыстық балалар ауруханасына бару үшін Тәуелсіздік көшесіндегі көпір арқылы өтіп, Бозғұлов көшесімен жүруге болатынын ескертеміз. Бұл бағыт тұрғындар үшін ең қолайлы әрі қолжетімді жолдардың бірі болып табылады.
Қала инфрақұрылымын дамытуға бағытталған бұл жұмыстар уақытша қолайсыздықтар тудыруы мүмкін. Осыған байланысты тұрғындардан түсіністік танытып, ұсынылған балама жолдарды пайдалануды сұраймыз. Жүргізіліп жатқан жаңғырту жұмыстары аяқталғаннан кейін жол сапасы жақсарып, көлік қозғалысы анағұрлым ыңғайлы әрі қауіпсіз болатынына сенім мол.
