Қармақшыда кәсіпкерлік пен инвестициялық жобалардың қарқыны артып келеді
Қармақшы ауданында кәсіпкерлікті қолдау, инвестиция тарту және жаңа өндіріс орындарын ашу бағытындағы жұмыстар жүйелі түрде жүзеге асырылып келеді. Мемлекеттік бағдарламалардың тиімді тетіктерін пайдалану арқылы шағын және орта бизнесті дамытуға, жаңа жұмыс орындарын құруға және аудан экономикасын әртараптандыруға ерекше басымдық берілуде.
Бұл туралы Қызылорда облысының Өңірлік коммуникациялар қызметінде өткен баспасөз брифингінде аудан әкімі Жандос Еркінбек мәлімдеді.
Брифинг барысында аудан басшысы кәсіпкерлік саласының өңір экономикасының тұрақты дамуына ықпал ететін негізгі бағыттардың бірі екенін атап өтті. Оның айтуынша, мемлекеттік қолдау шараларының нәтижесінде кәсіпкерлік белсенділігі артып, жаңа инвестициялық жобаларды жүзеге асыру бойынша нақты жұмыстар жүргізілуде.
2026 жылдың 1 маусымындағы жағдай бойынша Қармақшы ауданында 2 837 кәсіпкерлік субъектісі тіркелген. Оның ішінде 2 701 кәсіпкерлік субъектісі белсенді жұмыс істеп, белсенділік деңгейі 95,2 пайызды құрады. Бұл аудан кәсіпкерлерінің экономикалық белсенділігінің жоғары екенін және мемлекеттік қолдау тетіктерінің тиімділігін көрсетеді.
Аудан әкімінің айтуынша, кәсіпкерлерді қолдау бағытындағы жұмыстар биыл да өз жалғасын тапқан. Жыл басынан бері мемлекеттік қаржылай қолдау бағдарламалары аясында жалпы құны 326,6 млн теңгені құрайтын 37 жоба қаржыландырылды.
Атап айтқанда, «Ауыл аманаты» бағдарламасы арқылы 35 жобаға 292,6 млн теңге көлемінде жеңілдетілген несие берілсе, Аграрлық несие корпорациясы арқылы 2 жобаға 34,0 млн теңге көлемінде қаржылай қолдау көрсетілді. Бұл қаржы ауыл кәсіпкерлерінің жаңа жобаларды жүзеге асырып, өндіріс көлемін ұлғайтуына және кәсіпкерлік қызметін дамытуына мүмкіндік беріп отыр.
Брифингте инвестициялық ахуалды жақсарту мәселесіне де ерекше назар аударылды. Ауданға инвестиция тарту, жаңа өндірістерді іске қосу және экономиканың нақты секторын дамыту бағытындағы жұмыстар жүйелі түрде жүргізілуде.
Осы жұмыстардың нәтижесінде Өңірлік үйлестіру кеңесінің шешімімен жалпы құны 67,5 млрд теңгені құрайтын 4 инвестициялық жоба мақұлданып, сүйемелдеуге алынды. Бұл жобалар өндірістік әлеуетті арттырумен қатар, өңір экономикасының тұрақты дамуына серпін беретін маңызды бастамалардың бірі саналады.
Аталған инвестициялық жобалар толық іске асырылған кезде 168 жаңа жұмыс орны ашылады деп жоспарлануда. Бұл өз кезегінде аудан тұрғындарын тұрақты жұмыспен қамтуға, халықтың табысын арттыруға және өңірдің өндірістік әлеуетін нығайтуға мүмкіндік береді.
Жандос Еркінбек кәсіпкерлікті қолдау, инвестиция тарту және өндіріс көлемін ұлғайту бағытындағы жұмыстар алдағы уақытта да жалғасатынын атап өтті. Оның айтуынша, мемлекеттік бағдарламалардың мүмкіндіктерін тиімді пайдалану, инвесторларға қолайлы жағдай жасау және жаңа жобаларды іске асыру арқылы аудан экономикасының тұрақты өсімін қамтамасыз ету – негізгі басымдықтардың бірі болып қала береді.
Баспасөз брифингінде айтылғандай, кәсіпкерлікті дамытуға бағытталған кешенді шаралар жаңа бизнес бастамалардың көбеюіне, инвестициялық белсенділіктің артуына және Қармақшы ауданының әлеуметтік-экономикалық әлеуетінің одан әрі нығаюына негіз қалайды.
