Жүргізушілерге көмек: қауіпті учаскелерге айналар қойылды
Жол қауіпсіздігін арттыру және жол-көлік оқиғаларының алдын алу мақсатында жаңадан салынған Тәуелсіздік көшесінде бірқатар маңызды жұмыстар атқарылды. Атап айтқанда, көріну мүмкіндігі шектеулі бес бұрылыста арнайы жол айналары орнатылды. Бұл — жүргізушілердің қауіпсіздігін қамтамасыз етуге бағытталған нақты әрі тиімді шаралардың бірі.
Аталған айналар жолдың қауіпті тұстарында, әсіресе қарсы бағыттан келе жатқан көліктерді немесе жаяу жүргіншілерді уақытылы байқау қиын болатын жерлерде орналастырылған. Мұндай құрылғылар жүргізушінің көру аймағын кеңейтіп, «соқыр бұрыштарды» анық көруге мүмкіндік береді. Соның арқасында жүргізушілер жол жағдайын алдын ала бағалап, дер кезінде шешім қабылдай алады.
Мамандардың айтуынша, жол айналарын орнату – жол-көлік оқиғаларын азайтудың қарапайым әрі тиімді тәсілдерінің бірі. Әсіресе, жаңа жол учаскелерінде немесе инфрақұрылымы толық қалыптаспаған көшелерде мұндай қауіпсіздік құралдарының маңызы зор.
Жалпы, жол айнасы – жол қозғалысы қауіпсіздігін қамтамасыз ететін маңызды элементтердің бірі. Ол тек жүргізушілерге ғана емес, жаяу жүргіншілердің де қауіпсіздігін арттыруға септігін тигізеді. Алдағы уақытта мұндай жұмыстар қаладағы өзге де қауіпті учаскелерде жалғасын табады деп жоспарлануда.
