Таза Қазақстан: Сырдарияда көркейту және көгалдандыру жұмыстары қарқынды
Таза Қазақстан республикалық бастамасы аясында Сырдария ауданы көлемінде сенбілік жұмыстары кеңінен ұйымдастырылып, көркейту, көгалдандыру және абаттандыру шаралары жүйелі түрде жүргізілуде. Мемлекет басшысының тапсырмасына сәйкес қолға алынған бұл игі бастама өңірдің экологиялық ахуалын жақсартуға және тұрғындардың өмір сүру сапасын арттыруға бағытталған.
Сенбілік барысында кент орталығында бірқатар ауқымды жұмыстар атқарылды. Атап айтқанда, қоғамдық орындар мен көшелерде тазалық жұмыстары жүргізіліп, ғимараттар мен нысандарға әрлеу, сырлау-бояу жұмыстары жасалды. Сонымен қатар, гүл егу, ағаш көшеттерін отырғызу жұмыстары қарқынды жүргізіліп, елді мекеннің эстетикалық келбетін жақсартуға басымдық берілді. Жасыл желекті көбейту арқылы қоршаған ортаның сапасын арттыру көзделуде.
Бұл шараларға аудан тұрғындары, еріктілер, мекеме қызметкерлері белсенді қатысып, ортақ іске жұмыла кірісті. Бірлескен еңбектің нәтижесінде көшелер мен қоғамдық орындар тазартылып, ретке келтірілді. Мұндай бастамалар тұрғындардың қоршаған ортаға деген жауапкершілігін арттырып қана қоймай, қоғамда экологиялық мәдениетті қалыптастыруға да зор ықпал етеді.
Жалпы, «Таза Қазақстан» акциясы аясында жүзеге асырылып жатқан жұмыстар ауданның санитарлық жағдайын жақсартып, өңірдің көркеюіне оң әсерін тигізуде. Тазалық пен тәртіпті сақтау – тек бір реттік шара емес, күнделікті дағдыға айналуы тиіс екені де ерекше атап өтілуде.
Алдағы уақытта да абаттандыру, көгалдандыру және тазалық жұмыстары тұрақты түрде жалғасын табады. Бұл бағыттағы жүйелі жұмыстар өңірдің экологиялық тұрақтылығын қамтамасыз етіп, тұрғындарға қолайлы әрі таза орта қалыптастыруға мүмкіндік береді.
